2Ti 1 | YML | STEP | Yau Faulo a vekaiwa Timoti 'waimuye. Yaubada nuanuana bega a vetomata'aulele Iesu Keliso faifaina. Basenadi i vona'awaufaufa egavo i na miave'itubama Iesu Keliso taiadi mia 'atumaina wata miamia-vagaina i na veluagai, faifainanina i vetuneku a lalau'age.

2 Timothy 1

1 Yau Faulo a vekaiwa Timoti 'waimuye. Yaubada nuanuana bega a vetomata'aulele Iesu Keliso faifaina. Basenadi i vona'awaufaufa egavo i na miave'itubama Iesu Keliso taiadi mia 'atumaina wata miamia-vagaina i na veluagai, faifainanina i vetuneku a lalau'age.

2 Timoti, a nuakalikaliemu wata a ve'awa-natunemu. 'Omu mogitana bani'odi natuku, begaidi a vevelu'ui faifaimu nuanuaku Yaubada Tamada wata Iesu Keliso 'ada Toveimea ma yadi nuakalikali i na vevesauluva 'atumaina 'waimuye wata i na 'i'isanuakalikaliemu. Wata nuanuaku yadi nuanua bikana i na velevelemu, mia 'atumaina taiadi.

S2 1 Tim 1:2

Faulo i velu'ase'ase wata i vekaiwa.

3 Timoti, tutuya fuedi, lovana wata 'aiata ma yaku vekaiwa faifaimu a vevelu'ui Yaubada 'waineye. Basenadi tubukwavo i vetofolova Yaubada 'waineye yau wata 'asiau bega 'aku vebae 'wainega a lutonovi yaku sauluva tonovidi mataneye. 4 Yamu 'we'wela a nuanuani tutuyanina a 'iawemu bega nuanuaku bwaikina wata a na 'isemu a na sosoana. 5 Yamu vetumagana mogitana Keliso 'waineye a nuanuani, bani'odi inamu Iunisi wata nagami inadi Losi yadi vetumagana. Bega a 'asetamu yamu vetumagananina i 'eno'eno fa'alina. 6 Basenadi nimaku a yatoi 'waimuye a velu'ui, Yaubada tamu nuakalikali i velemu yamu folova faifaina. Fai yamu vetumagana mogitana i 'eno'eno, nuanuaku nuakalikalinina 'u na sisi'augi. 7 'U na sisi'augiga fai 'Anu'anunu 'Atumaina Yaubada i veledaga kebu yada 'eba ve'awamayamayaga, yana 'aivaita 'wainega ta vevetoketoke, ta nunuakalikali wata taunida yada sauluva ta 'i'isave'avinidi.

8 Toketokena i velemuga, bega 'ada Toveimea Keliso 'ana vetolu'ivona faifaina kebu 'u na bunumayaga, wata yau Keliso faifaina vanuga 'eba yogona 'waineye a miamia, kebu 'u na bunumayageku. 'U na vevetolu'ivonaga Iesu Valana 'Atumaina faifaina, vita 'u na veveluagadi yau bani'odi, siwe kebu 'u na kolologa 'u na tokemaigemu fai Yaubada toketokena i na velemu, 'amu vita 'adi fata bani'odi. 9 I 'ita'ita'ieda sakona 'waidiega i goleda bega yada sauluva i na ve'atumai mataneye. Kebu tamu yada folova 'atumaina faifaina i da venua'ivineda, fai taunina yana nuanua wata yana nuakalikali 'waidiega. Bola fwayafwaya kebu i da 'idewaiga, nuakalikalinina i veleda Iesu Keliso 'wainega we'e 'asiau Iesu Keliso 'ada To'ita'ita'i yana mai 'wainega nuakalikalinina i vemageta. I vemagetaga fai wafa yana toketokena Keliso i ve'a'avai wata Valana 'Atumaina 'wainega mia 'atumaina wata miamia-vagaina i sivemageseni.

11 Yaubada yana venua'ivinayega i veimeyeku Valanina 'Atumaina faifaina a vetomata'aulele, a vevetolu'ivona wata a vetove. 12 A vetolu'ivonaga begaidi vita a veveluagadi a miamia vanuga 'eba yogona 'waineye, siwe kebu tamu sai'afo a da bunumayaga fai a nuani wata a 'asetai taunina 'waineye yaku vetumagana a yato-vagaseni. A 'asetai mogitana nani matatabuna a 'anivelenedi 'waineye i na 'i'isave'avinidi i na nagoga yana 'Aiata Bwaikina 'waineye i na vila-vaitugani.

13 Fai ta miave'itubama Iesu Keliso taiadi, ta nuakalikali wata ta vetumagana 'waineye, begaidi nuanuaku ve tonovidi 'waikuyega yamu 'eba 'isa, 'waidiega 'u na veve tomotoga 'waidie. 14 Naninidi 'atumaidi Yaubada i velemuga 'u na 'i'isave'avinidi 'ada labilabina 'Anu'anunu 'Atumaina yana toketokena 'wainega.

S3 Fol 24:16S5 Fol 16:1S7 Lom 8:15S8 Lom 1:16
S9 Efe 2:8-9 Tai 3:4-5S10 Ibu 2:14-15S11 1 Tim 2:7
S13 Tai 1:9

Faulo enavo fuedi i degalovei.

15 'Akonadi 'u 'asetai tutuyanina vanuga 'eba yogona 'waineye i yatoku tovetumagana matatabudi 'awalawa Eisia nageneye i degaloveku, tomotoganidi 'waidiega 'adi 'ailuga side 'adi wagava, Fisilasi wata Elimotini.

16 We'e tamu, 'ana wagava Onesifolasi tutuyanina a miamia vanuga 'eba yogona 'waineye kebu i da bunumayageku. I viwai i fogefogeku wata i 'ivesosoaniku begaidi a vevelu'ui nuanuaku Yaubada i na vesauluva 'atumaina taunina wata yana 'aila'a 'waidie. 17 Tutuyanina i le'wa Loma, i lualeku i nagoga nika i veluagaku. 18 'Awaie Keliso yana vila-vaitugana 'waineye, nuanuaku 'Auvea i na nuakalikalieni. We'e tutuyanina 'a miamia Efeso yana 'aivaita 'waikuye 'akonadi 'u 'aseta'a'avadi.

S15 2 Tim 4:16